11 months 11 days 5 hours 34 minutes 41 seconds ago
വിസ അപേക്ഷകളുമായി ഒാഫിസുകൾ കയറിയിറങ്ങുന്നത് ഇനി പഴങ്കഥ. നടപടിക്രമങ്ങൾ എളുപ്പമാക്കുന്നതിനുള്ള ഇ-വിസ സമ്പ്രദായം നിലവിൽ വന്നതായി റോയൽ ഒമാൻ പൊലീസ് അറിയിച്ചു. രാജ്യത്ത് അവധിക്കാലം ചെലവഴിക്കാനും ബിസിനസ് ആവശ്യത്തിനും എത്തുന്നവർക്കും മറ്റുമെല്ലാം ഏറെ സഹായകമാണ് പുതിയ സംവിധാനം. വിസക്കായി ഒാൺലൈൻ അപേക്ഷ സമർപ്പിക്കുന്നത് വഴി ബന്ധപ്പെട്ട ഒാഫിസുകളിലെ ക്യുവിെൻറ നീളം കുറയുമെന്നും ആർ.ഒ.പി ട്വിറ്ററിൽ അറിയിച്ചു.
ഒമാനിലേക്കുള്ള യാത്ര എളുപ്പമാക്കുന്നതാണ് പുതിയ സംവിധാനമെന്ന് റോയൽ ഒമാൻ പൊലീസ് അറിയിച്ചു. ലോകത്തിെൻറ ഏത് ഭാഗങ്ങളിൽനിന്ന് അപേക്ഷിച്ചാലും ഉടൻ വിസ ലഭ്യമാകും വിധമാണ് സംവിധാനം സജ്ജീകരിച്ചിട്ടുള്ളത്. www.evisa.rop.gov.om എന്ന വെബ്സൈറ്റിൽ രജിസ്റ്റർ ചെയ്ത് യൂസർനെയിമും പാസ്വേഡും സ്വന്തമാക്കുകയാണ് ആദ്യം വേണ്ടത്. മൂന്ന് ഘട്ടങ്ങളിലായാണ് വിസക്കായുള്ള അപേക്ഷ പൂർത്തിയാവുക. ഒാരോരുത്തരുടെയും മാതൃരാജ്യവും ഒമാനിൽ താമസക്കാരാണോ അല്ലയോ എന്നീ വിവരങ്ങൾ നൽകിയാൽ ഏതുതരം വിസകൾക്ക് അർഹരാണ് എന്ന വിവരം സ്ക്രീനിൽ കാണിക്കും.
ഒാൺലൈനായി പണം അടക്കുകയും ചെയ്യാം. ആദ്യഘട്ടത്തിൽ ബിസിനസ്, ടൂറിസ്റ്റ് വിസകൾ മാത്രമാണ് ലഭ്യമാവുക. 167 രാഷ്ട്രങ്ങളിൽനിന്നുള്ളവർക്കും ജി.സി.സി രാഷ്ട്രങ്ങളിൽ താമസിക്കുന്ന 116 തസ്തികകളിൽ ജോലി ചെയ്യുന്ന വിദേശികൾക്കുമാണ് ഇൗ വിസകൾക്ക് അപേക്ഷിക്കാൻ അർഹതയുള്ളത്. എംപ്ലോയ്മെൻറ് വിസയടക്കം കൂടുതൽ സൗകര്യങ്ങൾ ഘട്ടംഘട്ടമായി മാത്രമാകും ആരംഭിക്കുക.
ഹോട്ടലുകൾക്കും ടൂർ ഒാപറേറ്റർമാർക്കും വിനോദസഞ്ചാരികൾക്കുള്ള വിസക്ക് ഇൗ സംവിധാനം വഴി എളുപ്പത്തിൽ അപേക്ഷിക്കാൻ കഴിയും. സഞ്ചാരികൾക്ക് നേരിട്ട് അപേക്ഷിക്കാനും സാധിക്കും.
News Courtesy: Gulf Madhyamam
